林鄭月娥-負評

林鄭月娥 負評太勁會撕裂社會

眾傳媒搵social media專家去分析網上輿情,佢地嘅數據,其實都反映到個別候選人一旦當選會造成嘅結果,而 林鄭月娥 嘅負評數字,特別引起咗我嘅注意,我認為有必要認真咁分析一下。

林鄭月娥 負評太勁,上台後果唔輸特朗普

通常乜嘢人當選會嚴重撕裂社會,就係一啲負評太勁嘅人,例如特朗普,呢個人嘅負評同爭議性都太強,所以大件事。而眾傳媒嘅數據,其實好幫到大家知道,邊一位候選人嘅負評或爭議性程度,去到特朗普級數。而 林鄭月娥 嘅負評度,係非常之一馬當先。

候選人 總數字 負評比 正評比 中立比
林鄭月娥 1051869 77% 14% 8%
曾俊華 678349 18% 53% 30%
葉劉淑儀 298278 42% 39% 19%
胡國興 152470 17% 66% 18%
數據來源:眾傳媒

我以為希師奶嘅負評度,已經係極品之列,但依家係 林鄭月娥 竟然觸發過百萬人次當中嘅七成七去俾負評你,即係有接近八十萬人次嘅負評,呢個係相當恐怖,梁振英都係去到唐英年踢爆梁振英要出動防暴隊真面目後,至去到呢個負評水平。你話 林鄭月娥 一旦上台,點會唔撕裂社會到震,連一向言論惹火,酸性極重嘅希師奶,都做唔到 林鄭月娥 嘅水平(雖然講還講,唔好貼相,我唔想有讀者嘔吐大作)。

所以要社會和諧,係無乜理由俾 林鄭月娥 上台,事實上,呢個人喺social media嘅風評極差,大家未必好支持個別特首候選人,但如果好憎個別候選人, 林鄭月娥 就一定係最乞人憎果個,如果一眾選委做出錯誤決定,香港嘅社會撕裂一定勁過依家梁振英年代,這殊非香港之福。

發表迴響

你的電子郵件位址並不會被公開。 必要欄位標記為 *