明天系

有乜公司查實係 明天系 架,公布出嚟好

今年打工仔,固然會初五咁嘅樣,只不過,肖建華事件發生後,證監好似瞓咗覺咁,完全無提醒 明天系 嘅公司就肖建華嘅下落,以及大股東可能出現嘅風險作出公告,如果小股民懵盛盛做咗大閘蟹,證監假期竟然真係放假,都係難辭其咎。

只不過,最恐怖都唔係 明天系 嘅公司無出公告,如果醒少少嘅股民,知道自己投資嘅公司,大股東有明天控股份,或者手上嘅投資項目,同明天控股關係密切,我相信已經有一大堆賣盤準備好,相信喺早上開盤果陣已經見到,對股民最無陰功,係自已炒緊果隻股,係唔係 明天系 相關人馬控股都唔知。

明天系 控股架構複雜到似迷宮

其實 明天系 喺契丹嘅控股結構,已經有名密過蜘蛛網,講緊果啲人頭都成四千幾人,呢個仲要係浮喺水面果啲,如果果啲人頭揸嘅貨,或者借嘅錢,係唔駛向證監披露嘅,咁仲有幾多,根本無人知。如果 肖建華 係要嘔番晒啲錢出嚟,當然有可能係直送政府,但更大可能係先沽出,再變錢送俾政府,特別係海外果啲,因為海外沽完就即變外匯。咁 明天系 擺明車馬喺香港持有嘅資產或上市公司,固然好有沽售壓力,但 明天系 暗中持有果啲,如果肖建華啲人頭突然大手沽貨,啲炒三四線股啲股民,真係會死咗都唔知乜事。

所以,證監固然有責任要求, 明天系 有關果啲公司,應該發出公告,如果發咗公告,仲有人要玩落去,就貴客自理喇。但如果係暗 明天系 果啲,例如資金來源查實係 明天系 嘅公司,果啲公司係唔係都應該披露一下,如果啲大股東暗中走人嘅,證監會又唔知會唔會認真看待呢?總之呢次肖建華咁樣被人捉上洗頭艇,提醒香港嘅投資者,被大量不明來歷紅色資本污染嘅股市,並唔係普通人玩,你睇唔透契丹政局學人玩股票,真係死咗唔知乜事。如果你仲夠薑玩option、窩輪果啲,果啲我幫你唔到嘞。

發表迴響

你的電子郵件位址並不會被公開。 必要欄位標記為 *