肖建華

搵黑社會押走 肖建華 : 共產黨顏面何存

肖建華 事件嘅發展唔單只快到離奇,係連成個事情嘅發展,都超越晒中共黨史嘅邏輯。香港《蘋果日報》收到聲稱係權威消息,話上次帶走李波由強力部門直接出手太膠,所以呢次係搵 黑社會 去帶走 肖建華 。

搵黑社會捉 肖建華 ?呢件事我半信半疑,因為以中共一貫行事方式嚟睇,如果中共中央求黑社會帶走某條友,日後一定尾大不掉,共產黨係唔會咁做,如果共產黨真係為咗個 肖建華 ,打破多年以嚟對黑社會嘅禁忌嘅話,中共究竟仲剩幾多實力,我個人會十分之懷疑。

共產黨唔會同黑社會分享權力,更何況搵黑社會捉 肖建華

喺香港呢啲非共產黨全面控制地區,對黑社會或者仲會懷柔甚至合作,但喺中國本土全面由共產黨控制地區,同埋涉及公檢法範疇嘅事,共產黨係唔會預黑社會份,甚至視黑社會為重點打擊對象,因為黑社會嘅本質,就係瓜分當政者對武力以及某啲不合道德規範事業嘅壟斷,所以至叫做黑社會。共產黨一向以嚟係,邊個地方黨官同黑社會分享權力,果條友死得更慘,梁振英其中一條罪狀,其實正係藉勾結黑社會嚟上台,既然係咁,又點可能為咗一個 肖建華 而動用黑社會。

如果真係由黑社會帶走 肖建華 ,咁呢件事更加複雜離奇,我姑且大膽提供多兩個可能性,俾大家參考一下:

1. 曾慶紅搵人帶走 肖建華 殺人滅口,免得佢爆太多嘢俾習系,如果係咁嘅話,或者可以解釋到點解突然間 肖建華 個微信被人滅咗。曾慶紅呢條友,係有同黑社會合作嘅傾向甚至經驗。
2. 習近平完全無人,被迫同黑社會合作,但如果係咁,證明佢比想像中弱勢,咁江習一攤牌,情況就凶險好多,因為習近平露出佢嘅弱底牌。

肖建華 件事點發展,好值得大家留意,相信習江大亂鬥去到一個失控嘅地步,如果用黑社會捉人都得,香港政府完全唔理嘅話,香港無論邊一派嘅人,係唔係最終要自備武器上街?真係遲早有人私藏槍械都唔奇,因為當政果個,都已經唔用正規嘅執法團隊,而係用埋啲流氓爛仔。

發表迴響

你的電子郵件位址並不會被公開。 必要欄位標記為 *