肖建華

肖建華 被捉上洗頭艇代表乜

明鏡新聞無講邊個喺香港有八個保鑣嘅情況都被人捉走,但同解放軍總參系統關係密切嘅博訊,就爆咗係 肖建華 。當然,用強力部門捉人上洗頭艇,我話知你 肖建華 定董建華,我們都要譴責,呢個係唔尊重《中英聯合聲明》,而且亦會開壞先例。只不過, 肖建華 被人捉上洗頭艇,仲要話同反習集團有關,有兩個訊息大家可以留意吓,特別係香港啲土共,呢方面咪話我呢啲研究中共黨史嘅無提醒過你。

肖建華 幫手鎮壓民主運動唔係免死金牌 同曾慶紅玩得太埋自己小心

肖建華 係點上位,呢條友喺一九八九年北京大屠殺之前,係北大學生會會長,呢條友係靠出賣佢啲同學俾共產黨而扶搖直上,平步青雲,同香港好多土共同一樣,都係靠出賣民主運動嚟上位。由於一九八九年北京大屠殺問題定性無改,所以參與鎮壓或者出賣朋友果啲,就算有幾大嘅政治問題,都唔會有事。

但 肖建華 被捕反映就係,你做六四鬼頭仔果啲,唔單只無免死金牌,隨時會死快啲,其實大家睇點解支聯會班大中華膠無端端可以攞回鄉證都係一個重要訊號,習近平攞六四嚟鬥人都唔奇,一如普京都可以用沙哈羅夫等嚟同蘇共劃清界線,甚至扮自己都係支持民主人權一樣。香港班土共駛唔駛準備一九八九年果陣自己聲援學生啲相同廣告以備一用咁。

同曾慶紅玩得太埋,呢鑊仲大劑, 肖建華 呢次中招,正正因為佢係曾慶紅啲死黨嚟,即係依家習近平決定向曾慶紅啲老友開刀,而且手法極為心狠手辣,你班香港商界佬如果有人撐過曾慶紅,仲懵盛盛去支持張曉明,我睇怕你班友喺契丹啲生意都應該係凍過北冰洋啲海水。

肖建華 長年住喺IFC四季酒店,果度咁戒備森嚴,有八個保鑣都被人捉上洗頭艇,究竟中環啲治安係點嘅環境,我個人並唔識評論,上次李波喺柴灣工業區,仲話果度人影都唔見隻啫。總之呢次係強到爆燈嘅訊號,我諗都唔駛出動到成報提醒大家,我呢度都可以提醒香港班做生意嘅,近得曾慶紅、張曉明呢啲人太多無乜著數,李嘉誠撤資,除咗支爆因素,亦有權鬥因素,呢啲時候,係要同中共嘅權鬥保持距離。決定提名乜人做特首果陣,咪聽果啲聲稱代表中央嘅人亂點,隨時果啲亂傳聖旨嘅友仔,第二日被人捉咗上洗頭艇人間蒸發都唔知。

One thought on “肖建華 被捉上洗頭艇代表乜

發表迴響

你的電子郵件位址並不會被公開。 必要欄位標記為 *