航拍機

航拍機 應唔應該入商場:應該睇型號同埋等技術改進

有班鬼佬喺觀塘apm商場用 航拍機 拍嘢,仲上埋網,呢個係侵犯商場嘅利益唔駛講(商場唔俾攝影其實有佢商業考慮),但更大問題係, 航拍機 有可能出意外傷及無辜,個個咁玩仲得了。

dji 果啲大機唔得,細機可以諗

喺室外,其實香港玩 航拍機 都有啲牙煙,但仍然可以接受嘅,只要小心操作同埋GPS訊號正常,但如果喺商場,DJI果啲大機一定肥佬,一嚟無GPS訊號,完全人手操作下導航,本身就危險,另一方面, dji嘅機有一定重量,螺旋槳設計更加無預你喺室內玩,一旦有人受傷要商場孭,如果商場CCTV帶發現果班鬼佬係用DJI嚟玩,我認為要興訟,因為DJI啲機,一定唔係紙飛機咁安全。

但如果係 Parrot 果啲設計喺屋企都可以放嘅Mini drone,咁另一種睇法,因為果啲mini drone唔依賴 GPS訊號,而且重量輕,同埋果啲屋企都可以玩,點解商場唔玩得先,安全系數隨時高過自拍神棍(自拍神棍係有一定危險性),呢個問題,商場業主興訟之前,最好搞清楚係乜嘢機,大家拆掂佢。有個清晰指引俾大家,因為如果有人用航拍玩自拍,你又唔俾,可以係好掃興嘅一件事嚟,或者商戶嘅PR,會想用 航拍機 做facebook live或其他嘢,甚至用嚟送貨,呢個係大勢所趨,我認為無得避,只不過商場啲人大驚小怪。呢啲嘢,係可以問有賣 航拍機 嘅商戶,因為 航拍機 已經唔只於DJI果啲大機。

只不過,無論大細機,有一度我認為係絕對唔玩得 航拍機,就係港鐵架空路軌前後若干米嘅範圍,因為一旦 航拍機 失事跌落路軌或架空電纜,造成無謂嘅列車故障甚至意外,呢個無人想咁做,就算地鐵系統嘅架空電纜都有千五伏,而九廣鐵路系統果啲,唔計輕鐵,更係兩萬五千伏特,呢啲地方講真玩唔起 航拍機 ,無論架機幾細都好。

One thought on “航拍機 應唔應該入商場:應該睇型號同埋等技術改進

發表迴響

你的電子郵件位址並不會被公開。 必要欄位標記為 *