Trump

Trump 嘅禁止回教國家國民入境政策已經膠到核爆

Trump 上台後,趕住找數,係咁簽行政命令實現佢啲政綱,只不過喺禁止回教國家國民一事上,膠到核爆,本來同 Trump 唔妥果啲IT公司,全部高調準備晒人同律師同 Trump 鍊過,連facebook老闆都出聲,跟住有英國、澳洲雙重國籍嘅人都一樣唔俾入境,件事越燒越勁,連保守黨嘅國會議員 Nadhim Zahawi 都郁佢,呢鋪 Trump 真係自己搵政治危機嚟玩。

Trump 行事粗疏出事

昨晚個post都講過, Trump 嘅玩法,有可能同憲法第十四修正條款抵觸,但更大問題係,好多依家喺美國出出入入果啲「回教國家國民」,根本本來係舊政權啲受害者或其後代,長期喺西方社會生活,而且已經歸化番西方國籍,只不過因各種歷史留落嚟嘅膠理由,退唔到原本嘅國籍,或情感上未必想退原本嘅國籍,畢竟佢地堅係被迫離開成長嘅家園,結果 Trump 嘅粗疏政策,只睇國籍,唔睇細節,結果膠爆。仲要講恐怖分子多,沙特呢啲出口恐怖分子嘅國家,竟然不在表上,奇哉怪也。

當然,如果香港人,又係持特區護照,都有理由要驚,因為照 Trump 嘅作風,佢應該係鍾意玩無差別攻擊,如果有乜禁令,無差別咁用喺所有特區護照持有人身上,都應該好有膠力。我相信遲早有大規模退出中國國籍潮,費時俾 Trump 啲玩法誤中流彈。

選前大家擔心 Trump 唔找數,依家證明 Trump 找數找得快,只不過依家係新問題,就係 Trump 呢個人做嘢方式粗疏,本來美國人已經好粗疏,佢係粗疏中嘅粗疏,好容易被人玩到謝,呢次就係實例。似乎依家 Trump 要學,係最基本嘅公共行政原則,同樣做右派,英國人(唔計Nigel Farage呢條hihi)稍為比美國人好,就係唔粗心大意,凡事按步就班,雖然BREXIT no plan令人大失所望。

發表迴響

你的電子郵件位址並不會被公開。 必要欄位標記為 *