鄭經翰

鄭經翰 出戰特首?露出狐狸尾巴?

梁國雄突然想話選特首,余若薇同一眾泛民顧全大局,成功勸退。跟住,《都市日報》就報導, 鄭經翰 話要考慮出戰特首,聲稱有泛民選委邀請佢老人家出山喎。

我真係想知邊個泛民主派選委咁益林鄭月娥,走去邀請 鄭經翰 出戰特首。但點解無啦啦有梁國雄出戰特首論,邊個係始作俑者,狐狸尾巴慢慢露出嚟。 鄭經翰 係唔係收咗邊方面柯打要玩鎅票,搞到佢赤膊上陣,我唔知。呢個好明顯唔係支持曾俊華嘅決定,非常符合佢喺2005年果陣,幫曾蔭權拉走泛民主派嘅提名,令曾蔭權當年不戰而勝嘅玩法。

鄭經翰 2005年果陣係點玩

2005年6月,泛民主派果陣考慮要提名李永達挑戰曾蔭權,當然,搵李永達呢啲人走去挑戰李永達,個idea膠到無朋友,但當時曾蔭權有可能不戰而勝嘅情況下,泛民主派派人去磨吓刀無壞,迫曾蔭權交政綱都好,但果陣 鄭經翰 就叫泛民杯葛選舉同提名,以下係2005年6月2日《星島日報》嘅screen capture嚟

鄭經翰
鄭經翰

好嘞,當時無法停止泛民主派嘅大計,而有啲唔妥曾蔭權嘅人,願意俾提名李永達果陣, 鄭經翰 果陣佢自己張提名固然俾咗曾蔭權,仲要攞埋當時仲係 鄭經翰老友嘅陳偉業,以及劉千石嘅提名。劉千石係香港徐庶,大家就算佢數(劉千石好早講咗,佢因佢阿媽緣故,唔可以喺民主立場上走得太前,所以無人怪佢後嚟變成咁,如果黃毓民學劉千石咁做,其實無邊個會怪佢,中共玩人質呢家嘢,第一日知咩)。只不過, 鄭經翰果陣,已經係打著民主派旗號幫啲權貴做嘢。

鄭經翰
鄭經翰

大家睇番 鄭經翰 2005年嘅玩法,跟住起錨一役,鄭經翰爭啲做埋轉軚支持政改嘅議員,到依家曾蔭權案聆訊期間,佢居然可以人喺美國(但成單案係咁出現 鄭經翰 嘅名,好鬼古怪),另一邊,又突然間喺曾俊華同胡國興受統監府壓力下,有機會攞唔夠提名,要向泛民攞提名果陣,就先嚟長毛出戰特首論,再嚟 鄭經翰 自己赤膊上陣,究竟有啲人玩緊乜把戲,唔顧現時嘅大局玩啲比2005年果次更核突嘅嘢,就真係佢自己先知。

但可以肯定係,如果曾俊華係曾蔭權2.0嘅話,咁依家有任志剛加持, 鄭經翰 暗助嘅林鄭月娥,又係啲乜咁?有啲左膠係真左膠,定係扮激進,喺關鍵時候就出怪招助西環上位,其實呢啲位係唔難睇得清楚嘅。

今次特首選舉,唔係2005年或2007年咁,泛民唔出就有人不戰而勝,今次特首選舉係土共嘅政權保衛戰,如果要隊冧土共呢個官商勾結集團,依家嘅目標係保送有能力贏出選舉,又立場中道嘅人入閘,然後再點樣合縱連橫,呢個至係最符合香港嘅根本利益,我對呢次特首選戰嘅立場,係同2012年果次一樣,以薩長同盟為喻,呢方面我係立場一致同清晰。以 鄭經翰 嘅政治判斷力,無理由睇唔到個大形勢,作出最適當嘅判斷,當你有能力對形勢作出判斷,而又做一啲古怪動作果陣,究竟你係代表乜嘢人嘅利益行事,有啲嘢我都無謂畫公仔畫出腸。

本文謝絕熱血時報轉載,非獨家轉載計劃並不適用於熱血時報

2 thoughts on “鄭經翰 出戰特首?露出狐狸尾巴?

  1. 鄭嘅意思係話,唔係鎅票,300+選委票最終全畀薯片,佢只是打渾插科宣揚民主理念,你哋信唔信?

發表迴響

你的電子郵件位址並不會被公開。 必要欄位標記為 *