林鄭月娥

林鄭月娥 憑乜認為中央不任命當選特首?

林鄭月娥 認咗喺對住傳媒嘅閉風吹風會度,講過如果選委選出嚟嘅特首不為中央接受,中央拒絕,會造成憲政危機,只係事實陳述。

任何事實陳述,都要有證據作出支持,喺依家梁國雄仍然未有跡象攞到提名票入閘果陣, 林鄭月娥點解要講中央可能唔接受當選人,拒絕任命造成憲政危機。到底佢憑乜嘢會認為會有中央政府唔接受嘅候選人當選,如果係事實陳述,就會有證據或情報去支持 林鄭月娥 嘅推斷。咁請問 林鄭月娥 ,你收到乜人俾你嘅情報,斷定可能出現中央政府唔接受嘅候選人,而會當選。簡單嚟講, 林鄭月娥 有幾個問題,係一定要答覆公眾,唔係乜嘢「政改模式」,「事實陳述」呢啲語言偽術,就可以求其敷衍公眾。

1. 邊個向 林鄭月娥 提供呢啲資訊? 至少必須提供資訊提供人嘅背景,係唔係同張曉明有關

2. 提供資訊果個人,向 林鄭月娥 指邊個候選人可能不為中央接納。如果無指明人選,咁能否描述相關人等嘅特徵,是否同曾俊華、胡國興或葉劉淑儀等符合。

3. 相關人士幾時向 林鄭月娥 提供呢啲資訊。

簡單嚟講,依家 林鄭月娥 好明顯係捲入選舉舞弊或相關行為,如果廉署仍然可以公正辦事嘅話,一早有人向廉署舉報,更何況胡國興作為選管會嘅元祖主席,對選舉法律係瞭如指掌, 林鄭月娥 呢啲小動作,無可能可以逃過胡國興嘅法眼。

以上三條問題,大家一定要窮追猛打,咪放過 林鄭月娥 ,如果大家可以咁樣放過 林鄭月娥 ,我個人可以肯定,喺日後,呢條友實會繼續發揮吹水娥特色,繼續亂噏廿四,你估呢次打選戰,真係可以隨便玩hit and run㗎。

發表迴響

你的電子郵件位址並不會被公開。 必要欄位標記為 *