休養生息 係歷史常用 最唔讀中史果個叫梁振英

休養生息 四個字,都可以搞到梁振英親自向曾俊華開炮,可以見到梁振英對林鄭月娥嘅選情有幾上心。只不過, 休養生息 爭議,亦都反映咗梁振英係唔讀中史,如果香港要再闖高峰, 休養生息 係正常過正常嘅做法。

大家以前讀中史,應該讀過西漢王朝嘅文景之治,漢文帝同景帝以黃老之道治國,當時文景之治嘅前提,就係 休養生息 。點解要 休養生息 ,因為秦王朝一統中原果十幾年,壓搾人民到乾,跟住就有楚漢相爭群雄大混戰,社會真係被撕裂。所以漢文帝採取減少政府開支,輕徭薄賦嘅政策,匈奴嘅威脅就盡量唔郁佢,積累國家經濟實力。

如果無文帝期間嘅 休養生息 ,景帝執政第三年點可能為咗收回諸候權力,打果場七國之亂,最後成功擊敗劉姓宗室為主嘅諸候。如果唔係景帝喺七國之亂平定後,繼續採用 休養生息 政策,我想問漢武帝邊度嚟咁多實力同財政力量,同匈奴一決勝負。如果梁振英係真心有讀中史,邊度會膠到搵 休養生息 去挑機至得。中史上第一個治世,正係採行 休養生息 政策嘅文景之治。

吳克儉仲好意思迫學生讀中史,我諗我呢個英國統治時代讀中史嘅英國人,都會比依家日日講愛中國嘅契丹人,更加熟中國歷史。無為而治,其實係一件好事嚟。梁振英呢啲信與天鬥,與人鬥,其樂無窮嘅毛澤東變態信條嘅人,至會咁反對 休養生息 概念。

發表迴響

你的電子郵件位址並不會被公開。 必要欄位標記為 *