TOPICK

TOPICK 偷片偷得好核突

TOPICK 係香港經濟日報集團旗下嘅content farm,呢個大家都知,只不過, TOPICK 作為傳統傳媒,不單未有善用有香港經濟日報集團支持嘅優勢,用香港經濟日報嘅內容庫,做一個 Quality Content Farm,相反,呢個傳統傳媒出身嘅content farm,做出我都完全估唔到嘅事,就係玩facebook直播偷上偷,偷曾俊華facebook嘅直播片源嚟做live,用嚟呃like。

喺傳媒道德上, TOPICK 完全錯晒,作為傳媒,應該自己出去採訪,用自己記者嘅片源,唔係玩呢啲偷上偷,呢種偷法,我個人真係覺得,真係大榴槤級數, TOPICK 變咗香港版大榴槤?

但喺選舉法例, TOPICK 咁做,隨時係犯法,曾俊華未必介意你攞段片,但呢個係曾俊華宣布參選嘅記者招待會,個記者招待會本身會計選舉經費, TOPICK 係變咗未經候選人批准,幫候選人搞出選舉開支, TOPICK 負責人係監都有得坐。要偷片,都唔好偷段宣布參選嘅片。

我估好多頂唔順 TOPICK 嘅人,會告到廉政公署,因為已經膠到核爆。仲要咁樣偷片,質素好差,簡直係返到VCD年代。

發表迴響

你的電子郵件位址並不會被公開。 必要欄位標記為 *