奧運轉播真滴汗

今年香港兩大電視台的奧運評述,可以用令人O嘴又滴汗嚟形容。

1. 不知本分:連基本功課,港隊有乜嘢人在開幕出場都唔知,情況令人感到非常尷尬,究竟香港電視台都記唔記得自己係香港電視台。
2. 胡亂發音:成班二打六藝員,唔識亂發音,結果發膠音,林忌果度搵到十二件膠事,我想問,點解香港人可以忍受呢挺硬膠評述。
3. 大中國主義:香港得中國籍人士住架,點解可以大中國主義成咁,亞視居然可以節目名叫「為中國加油」,咁香港嘅英國、中華民國、印度、尼泊爾、美國、加拿大人全部唔駛睇電視喇。

唯一值得讚賞,係亞視徐嘉諾,佢真係好專業,其餘果些,你真係想爆粗。

唔該,香港各大電視台,全部奧運直播都留番條Nicam頻道,頂唔住硬膠嘅可以聽BOB的英文旁述。
====
延伸閱讀
繆美詩:黃金寶以外(作者是2004年的奧運主持)
林忌:奧運主持硬膠實錄

3 thoughts on “奧運轉播真滴汗

  1. 我亦不喜歡「大中國主義」,奧運是屬於全世界的,為何中國隊好的時候就讚,其他國家隊好的時候就彈,而且部份主持的評述亦相當偏心。

    同意徐嘉諾的表現相當專業,可惜亞視播放時的收音強差人意。

  2. 我有看中美藍球大戰一役…聽見阿叻既「肺腑之言」,特別是林忌記載「自己的馬打針」的一段,簡直o晒咀!

  3. keyman,鍾志光做左咁多年主持
    又唔係唔識講野、執生
    唔明點解無線係都要搵埋d咩都唔識ge人阻住
    (人多真係手腳亂,經常a講完bcde全部唔知點接)

    阿叻、蔡康年尤其差
    唔識又要扮到識,咩都插幾句入去
    d女主持雖然唔識,但至少唔會搶住講

    訪問人ge兩位女主持唔掂
    人地都未講完就搶住再問
    (e.g.柔道金牌廣東人冼東妹)
    最差就係最後一定要問有咩同香港人講
    我作為香港人真係感到好羞恥
    (而佢地問ge野充分反映佢地對運動員認識極淺)

    至於中美籃球戰當晚
    明明一路轉播男排
    但無啦啦又插播某商場直播籃球賽”盛況”

    1.搞到男排支離破碎
    2.所謂”盛況”就係一班藝員係咁問觀眾”你地係唔係全部都支持中國隊ar?!”,”你最支持中國隊邊個球員ar”……某女藝員落台訪問香港甲a南華籃球員時竟然話”聽講你係今年ge 得分王(類似ge野),可唔可以介紹o下你自己ar,你叫咩名ar?”(簡直係輕蔑別人侮辱自己)…

    呢段片對家庭觀眾有咩意義???為左商場廣告就要d睇緊男排ge觀眾睇班白痴講野有幾無知!

    我唔相信無線唔知道有人好反感
    只係觀眾無得揀,佢收視又唔差
    咁佢就用返同一模式繼續
    政府發牌ge禍害又一鐵證!

發表迴響

你的電子郵件位址並不會被公開。 必要欄位標記為 *