喺政治低氣壓之下,有唔少社運界中人都好奇怪,點解啲人仲有心去捧 MIRROR ,其實香港社運界,不分陣營都有問題,就係離地又要扮智慧高於平民。我自己YouTube個Show故意向美國Late Show個Format走,其實都係呢股政治低氣壓嘅結果。
MIRROR 對平民嘅安慰
香港政界一向有儒家遺留嘅大弊病,就係要求平民百姓做聖人,所以由去留之爭(依家都唔駛講去留之爭,當出現天誅人斬甚至封網果陣,根本你無得揀),到 MIRROR 興起,都係要求平民百姓去做聖人,所以有人白痴到黃色經濟圈鬥黃幫老共都唔知,其實核心文化基礎,就係儒家果種要人存天理去人慾嘅黐線思維。唔好意思,我對存天理滅人慾呢家嘢,一向都唔Buy。甚至我對朱子呢個偽君子,甚為痛恨。
甚至我可以咁講,連儂牆本來係追星嘅結果,無錯,追星嘅結果,啲捷克年青人,最初喺布拉格連儂牆寫嘅,都係披頭四同John Lennon啲歌嘅歌詞,就係咁樣,所以作為帶連儂牆嚟香港果個人,我根本唔會走去反對 MIRROR 追星,甚至師奶追星被黑警用 599G搞,唔係令更多平民百姓知道黑警嘅可怕乎?追星本身,都可以係一種反抗嚟。
而且低氣壓之下,其實更需要娛樂去令自己撐落去,特別對留低果啲人,我同留喺香港朋友嘅對話過程裡面,感受到佢哋嘅壓力同不快,呢個亦令我決定將節目裡面剩低憤怒語言減少,好似炮製劉正呢啲人渣,我就喺番文字版做,YouTube成個Show嘅Format同製作,都用美國式嘅方法做,最初目的,唔係令自己更專業,而係想令觀眾同自己,甚至我自己嘅朋友可以開心一啲,如果佢哋睇完可以笑,咁我就叫盡量幫到留喺度嘅人。我自己都唔知,唔係每一個人依家就可以撤離。
對抗疾病、對抗極權,都係要保持開朗,喺習近平嘅僵化思維之下,有一樣嘢我肯定知會贏到中共,就係保持幽默同笑容,中共可以存在,因為共產主義本身都係一種存天理滅人慾嘅極權思維,好好生活,其實就係呢個意思,我哋唔係對極權視而不見,但等待嚟自新世界嘅力量嚟解放香港前,大家唔能夠完全廿四小時都陷於悲情,咁樣唔抑鬱都黐線。喺呢方面,我一啲都唔中國膠,相反,我係用歐陸果套。
Düsseldorf係德國惡搞之鄉,狂歡節巡遊整花車寸政客係本城傳統(其實香港相對應係太平清醮),點解Düsseldorf係德國抵抗運動唯一成功嘅城市,喺西德成立後,惡搞文化係呢個城市重生,甚至係少數舊城區完好嘅城市,因為就係呢個城市永遠好好生活,但Hea住應付暴政嘅態度,成功保留有生力量。我都係果句,如果可以走請大家離開香港,或做好離港一切準備,但唔能夠離港,我諗我可以支援到大家,就係鼓勵大家,唔好黑住塊面做人。鄙視中共同佢嘅走狗,一有機會做帶路黨光復香港。時代革命同 be water 係相呼應,大家要好好記住。

